Kreu i Partia Demokratike e Shqipërisë, Sali Berisha, deklaroi gjatë mbledhjes së grupit parlamentar demokrat se procesi i integrimit europian të Shqipërisë është “plagosur rëndë” nga korrupsioni dhe aferat që, sipas tij, lidhen me kryeministrin Edi Rama dhe ish-zëvendëskryeministren Belinda Balluku.
Në fjalën e tij, Berisha tha se dosjet e korrupsionit dhe skandalet me tenderat kanë ndikuar drejtpërdrejt në procesin e negociatave me Bashkimi Europian.
“Procesi i integrimit është plagosur rëndë nga vjedhjet e Edi Ramës, Lubi Ballukut dhe aferat e AKSHI-t”, deklaroi ai.
Berisha pretendoi se raportet për Shqipërinë në strukturat europiane janë ndryshuar dhe plotësuar disa herë për shkak të shqetësimeve të vendeve anëtare mbi korrupsionin dhe shtetin ligjor.
Sipas tij, disa shtete të BE-së kanë shtuar rezerva dhe kërkesa shtesë lidhur me ecurinë e Shqipërisë në negociata, duke ndikuar në shtyrjen e konferencave ndërqeveritare që priteshin të zhvilloheshin më herët gjatë këtij viti.
Kreu demokrat theksoi se Partia Demokratike mbështet procesin e integrimit europian të vendit “mbi bazën e kriterit gjeopolitik”, duke e konsideruar anëtarësimin në familjen europiane si orientim natyror të Shqipërisë.
“Ne mbështesim fuqishëm vendosjen e Shqipërisë aty ku e ka vendin, në familjen europiane”, u shpreh Berisha.
Megjithatë, ai shtoi se qeveria aktuale “nuk plotëson asnjë kriter tjetër përveç atij gjeopolitik”, ndërsa garantoi se opozita do të vijojë të denoncojë problematikat që, sipas saj, pengojnë integrimin dhe funksionimin e shtetit ligjor në vend.
