Ish-drejtoresha e Tatimeve, Brisida Shehaj, ka bërë deklarata të forta lidhur me marrëdhëniet e saj me figura të Partia Socialiste e Shqipërisë, duke u ndalur veçanërisht te ministrja Albana Koçiu.
Gjatë një interviste televizive, Shehaj u shpreh se Koçiu përbën “zhgënjimin më të madh personal” për të, pasi sipas saj ato kanë pasur një miqësi të hershme, që nuk lidhej me politikën apo pushtetin.
Sipas Shehajt, marrëdhënia mes tyre ka ndryshuar pas përplasjes së saj me kryeministrin Edi Rama.
“Albana Koçiu për mua është zhgënjimi im më i madh personal. E kam pasur shumë mikeshë që herët, nuk më lidhte pushteti”, deklaroi ajo.
Ish-drejtoresha e Tatimeve pretendoi se shumë persona brenda mazhorancës shmangin kontaktet me të nga frika e reagimit të kryeministrit.
“Bën debat me Edi Ramën dhe njerëzit që i ke pasur miq prej 20 vitesh nuk të flasin më. Nuk të flasin në rrugë se i merr vesh Edi Rama dhe i qorton”, u shpreh Shehaj.
Ajo shtoi se ka pasur raste kur persona që nuk e përshëndesin publikisht i kanë shkruar më vonë në telefon për t’u justifikuar.
Deklaratat e Brisida Shehaj vijnë në vijim të kritikave të saj ndaj mënyrës së funksionimit të mazhorancës socialiste dhe klimës politike brenda saj.
