Gazetari Genc Burimi ka komentuar zhvillimet e fundit lidhur me çështjen e gjyqtares Irena Gjoka, duke deklaruar se vendimi për përjashtimin e saj nga çështja ndaj Sali Berisha nxjerr në pah, sipas tij, krizën e besimit në sistemin e drejtësisë shqiptare.
Në një intervistë televizive, Burimi u shpreh se rasti tregon se SPAK nuk është i ndjeshëm ndaj opinionit publik dhe vepron në mënyrë selektive në çështjet politike më të rëndësishme.
Ai solli si shembull çështjen Charles McGonigal, duke pretenduar se pavarësisht përmendjes së emrit të kryeministrit shqiptar në hetimet amerikane, nuk pati asnjë veprim konkret hetimor në Shqipëri.
“Ky SPAK është një instrument politik”, deklaroi Burimi, duke shtuar se sipas tij organi i akuzës “prek vetëm deri në një pikë, por jo qendrën e pushtetit”.
Gazetari tha se çështja e Irena Gjokës lidhet drejtpërdrejt me procesin ndaj Berishës dhe me përplasjet politike në vend, ndërsa ngriti dy hipoteza mbi zhvillimet e fundit: një “vetëpastrim të sistemit” nga elementë të ndershëm brenda drejtësisë dhe një mundësi të ndikimeve ndërkombëtare në proces.
Sipas tij, nëse çështja ndaj Irena Gjokës shkon deri në fund dhe provohen shkelje procedurale, kjo mund të ndikojë edhe mbi vlefshmërinë e proceseve të mëparshme gjyqësore ndaj Berishës.
Burimi kritikoi gjithashtu strukturën aktuale të reformës në drejtësi, duke thënë se sistemi ka krijuar shumë institucione dhe mekanizma që, sipas tij, shpesh mbivendosen dhe krijojnë mungesë besueshmërie.
“Nuk mund të jetë i njëjti institucion që humbet çështjen dhe më pas merr detyrën ta korrigjojë vetë atë”, u shpreh ai.
Në përfundim, Burimi deklaroi se drejtësia shqiptare ndodhet në një moment të vështirë, me kontradikta të forta dhe me një krizë të thellë besimi publik.
