Organizata Botërore e Shëndetësisë ka shpallur shpërthimin e virusit Ebola në provincën Ituri të Republika Demokratike e Kongos si emergjencë shëndetësore publike me shqetësim ndërkombëtar, për shkak të rrezikut të përhapjes në vendet fqinje.
Sipas të dhënave të publikuara nga OBSH, deri tani janë raportuar rreth 246 raste të dyshuara dhe 80 viktima. Megjithatë, organizata theksoi se situata aktuale nuk i plotëson kriteret për t’u shpallur pandemi globale.
Drejtori i përgjithshëm i OBSH-së, Tedros Adhanom Ghebreyesus, deklaroi se ekziston “pasiguri e konsiderueshme” lidhur me numrin real të të infektuarve dhe përhapjen gjeografike të virusit.
Autoritetet shëndetësore bëjnë me dije se shpërthimi është shkaktuar nga varianti Bundibugyo i Ebolës, për të cilin aktualisht nuk ka vaksina apo trajtime të miratuara.
Deri më tani janë konfirmuar tetë raste laboratorike, ndërsa raste të tjera të dyshuara janë raportuar në disa zona shëndetësore, përfshirë qytetin Bunia dhe zonat minerare Mongwalu dhe Rwampara në provincën Ituri.
Virusi ka kaluar tashmë kufijtë e Kongos. Dy raste të konfirmuara janë raportuar në Uganda, ku një burrë 59-vjeçar humbi jetën pasi rezultoi pozitiv me virusin.
OBSH paralajmëroi se vendet fqinje janë në rrezik të lartë për shkak të lëvizjeve të popullsisë, tregtisë dhe udhëtimeve ndërkufitare. Agjencia u kërkoi autoriteteve të Kongos dhe Ugandës të krijojnë qendra emergjente për monitorimin, gjurmimin dhe izolimin e rasteve të dyshuara.
Ekspertët sqarojnë se Ebola transmetohet përmes kontaktit të drejtpërdrejtë me lëngjet trupore dhe mund të shkaktojë gjakderdhje të rëndë dhe dështim organesh. Simptomat fillestare përfshijnë ethe, lodhje, dhimbje muskujsh dhe koke, ndërsa në fazat e avancuara shfaqen të vjella, diarre dhe hemorragji.
Virusi Ebola u identifikua për herë të parë në vitin 1976 në territorin që sot njihet si Republika Demokratike e Kongos. Ky konsiderohet shpërthimi i 17-të i regjistruar në vend.
Sipas OBSH-së, shkalla mesatare e vdekshmërisë nga Ebola arrin rreth 50%, ndërsa gjatë pesë dekadave të fundit rreth 15 mijë persona kanë humbur jetën nga virusi në vende të ndryshme afrikane.
