Administrata e Donald Trump ka nisur publikimin e dosjeve të deklasifikuara mbi UFO-t dhe fenomenet ajrore të paidentifikuara (UAP), duke rikthyer në qendër të debatit teoritë mbi jetën jashtëtokësore.
Sipas njoftimit të Pentagoni, materialet janë bërë publike pas urdhrit të firmosur nga Trump në muajin shkurt dhe përfshijnë:
- mijëra video,
- fotografi,
- raporte ushtarake,
- dhe dokumente të klasifikuara më parë nga institucione të ndryshme federale amerikane.
Autoritetet amerikane deklaruan se materialet tashmë janë të aksesueshme për publikun përmes platformave zyrtare të Departamentit të Mbrojtjes, pa nevojën e autorizimeve speciale.
Në një deklaratë në rrjetet sociale, Pentagoni theksoi se publikimi i dosjeve do të vijojë edhe në javët e ardhshme, ndërsa dokumente të tjera do të deklasifikohen gradualisht.
Debati mbi UFO-t mori vëmendje të madhe edhe pas deklaratave të ish-presidentit Barack Obama, i cili në një podcast tha se “alienët ekzistojnë”, megjithëse më pas sqaroi se nuk kishte parë prova konkrete për kontakte me qenie jashtëtokësore gjatë presidencës së tij.
Ndërkohë, administratori i NASA, Jared Isaacman, përshëndeti nismën për transparencë dhe deklaroi se eksplorimi i universit dhe kërkimi shkencor mbeten prioritete kryesore për agjencinë amerikane.
Publikimi i dosjeve ka ndezur reagime të shumta në rrjetet sociale dhe media, ndërsa studiues, entuziastë dhe skeptikë po analizojnë materialet për të kuptuar nëse ato përmbajnë prova reale mbi fenomene të pashpjeguara ajrore ose mundësi të ekzistencës së jetës jashtëtokësore.
