Kreu i Partia Demokratike e Shqipërisë, Sali Berisha, deklaroi se raporti i fundit i institucioneve europiane për Shqipërinë përbën, sipas tij, një konfirmim të denoncimeve të bëra prej kohësh nga opozita.
Në një konferencë për mediat, Berisha akuzoi kryeministrin Edi Rama dhe qeverinë për manipulim të procesit zgjedhor, korrupsion dhe lidhje me krimin e organizuar.
Sipas tij, opozita do të vazhdojë të paraqesë në forumet ndërkombëtare atë që ai e cilësoi si realiteti i situatës në Shqipëri.
“Opozita në Tiranë, në Bruksel, në Berlin, në Uashington dhe kudo do të thotë të vërtetat dhe vetëm të vërtetat”, deklaroi Berisha.
Ai pretendoi se qeveritarët janë përgjegjës për deformimin e procesit demokratik dhe kthimin e zgjedhjeve në “farsë elektorale”.
“Nuk janë shqiptarët që duan që vota e tyre të plaçkitet, është Edi Rama dhe qeveritarët shqiptarë që i shndërrojnë zgjedhjet në farsë elektorale”, u shpreh kreu i PD-së.
Berisha hodhi akuza edhe për lidhje të qeverisë me klanet e drogës dhe ndikim mbi sistemin e drejtësisë.
Sipas tij, raporti europian pasqyron shqetësime për përjashtimin e opozitës dhe qytetarëve nga procesi i integrimit europian, ndërsa thekson se ky proces nuk duhet të dominohet vetëm nga ekzekutivi.
Kreu i opozitës kritikoi gjithashtu atë që e quajti “censurë mediatike” ndaj raportit dhe u bëri thirrje gazetarëve që ta trajtojnë gjerësisht dokumentin.
