Përplasjet brenda Partia Demokratike vijojnë të thellohen, teksa aktivistja shqiptaro-amerikane Evi Kokalari ka sfiduar hapur kreun e saj Sali Berisha pas përjashtimit nga gara për drejtimin e partisë.
Në një reagim publik në rrjetet sociale, Kokalari ka publikuar një dokument që sipas saj provon anëtarësinë në PD, duke iu referuar pjesëmarrjes në Kuvendin e organizuar nga “Rithemelimi” në vitin 2021. Ajo pretendon se ky fakt rrëzon argumentin e përdorur për skualifikimin e saj nga gara e 23 majit.
“Shihemi në gjyq”, është mesazhi i drejtpërdrejtë i Kokalarit ndaj Berishës, duke paralajmëruar një betejë ligjore për të kërkuar të drejtën e kandidimit, të cilën ajo pretendon se i është mohuar padrejtësisht.
Sipas saj, pavarësisht se aplikimi nuk iu pranua fizikisht nga strukturat e partisë, ajo e dorëzoi dokumentacionin edhe në mënyrë elektronike. Megjithatë, kandidatura e saj nuk u mor në shqyrtim.
Kjo situatë nuk është e izoluar. Edhe figura të tjera të përjashtuara nga gara, si Mereme Sela, kanë paralajmëruar hapa ligjorë, ndërsa Ervin Salianji ka deklaruar se do të kërkojë ndërhyrje nga faktorë ndërkombëtarë dhe struktura si PPE.
Zhvillimet e fundit konfirmojnë një klimë të tensionuar dhe të fragmentuar brenda opozitës, ku procesi për zgjedhjen e kreut të ri të partisë po shoqërohet me akuza për mungesë gare reale dhe standardesh demokratike.
Mbetet për t’u parë nëse kjo përplasje do të kalojë në një proces të mirëfilltë gjyqësor dhe çfarë ndikimi do të ketë në zhvillimet e ardhshme politike brenda Partia Demokratike.
