Procesi për zgjedhjen e kreut të Partia Demokratike e Shqipërisë ka hyrë në një fazë të debatueshme, pasi në garë ka mbetur vetëm një kandidat – Sali Berisha.
Drejtori i komunikimit në PD, Alfred Lela, deklaroi se më 23 maj do të zhvillohet rikonfirmimi i Berishës në krye të partisë, duke e cilësuar procesin si të hapur dhe transparent.
Sipas tij, skualifikimi i kandidatëve të tjerë, përfshirë Mereme Selën dhe Vladimir Mulajn, lidhet me mosplotësimin e kritereve statutore, veçanërisht mungesën e një profili të lartë politik dhe publik.
“Procesi ka qenë në sytë e publikut dhe nuk ka pasur asgjë për të fshehur. Kandidatët e skualifikuar nuk përmbushnin kriteret për një profil të njohur politik në nivel kombëtar”, u shpreh Lela.
Ai shtoi se drejtimi i një partie të madhe kërkon figura me njohje të gjerë publike dhe aktivitet të konsoliduar politik, duke nënkuptuar se kandidaturat alternative nuk e përmbushnin këtë standard.
Zhvillimet kanë shkaktuar reagime të shumta brenda dhe jashtë partisë, ndërsa gara pa rivalë pritet ta shndërrojë votimin e 23 majit në një proces formal për rikonfirmimin e liderit aktual.
