Tensionet në garën për kreun e Partia Demokratike janë përshkallëzuar, pasi përfaqësuesi i Ervin Salianji deklaron se nuk është pranuar dorëzimi i dokumentacionit për kandidimin e tij.
Orest Berberi, përfaqësues i Salianjit, u paraqit në selinë blu për të depozituar dosjen, por sipas tij, nuk ka pasur asnjë zyrtar që të marrë në dorëzim dokumentet. Ai theksoi se është komunikuar vetëm me rojen e godinës, e cila i ka bërë me dije se nuk kishte përfaqësues në zyrë.
Berberi e cilësoi situatën si të qëllimshme, duke akuzuar drejtuesit e partisë për pengim të kandidimit. Sipas tij, kjo bie ndesh me deklaratat për një garë të hapur brenda PD-së.
“Vetë Sali Berisha e ka cilësuar Salianjin si martir të demokracisë. Ajo që po ndodh sot është për t’i prerë rrugën kandidimit. Në seli nuk ka asnjë zyrtar dhe kjo është e inskenuar”, u shpreh ai për mediat.
Përfaqësuesi bëri të ditur se dokumentet do të dërgohen në mënyrë alternative, përmes postës dhe elektronikisht, për të formalizuar kandidaturën.
Ngjarja vjen në një klimë përplasjesh të forta brenda Partia Demokratike, ku disa kandidatë pretendojnë se procesi zgjedhor është i mbyllur dhe nuk garanton konkurrencë reale përballë Sali Berisha.
