Avokati Edmond Petraj ka ngritur shqetësime serioze për gjendjen e Ilir Meta, duke deklaruar se ai po përjeton një përkeqësim të ndjeshëm psikologjik gjatë qëndrimit në paraburgim.
Sipas Petrajt, në një vit është vërejtur një ndryshim i thellë në gjendjen e ish-presidentit, të cilin ai e cilëson si “deformim të jashtëzakonshëm”. Ai theksoi se Meta po përballet me stres dhe ankth të fortë, duke kërkuar verifikim të menjëhershëm nëse ekzistojnë elementë diskriminimi në trajtimin e tij në qeli.
“Çdo i paraburgosur duhet të trajtohet me dinjitet dhe pa asnjë formë torture. Duhet parë nëse ka trajtim të pabarabartë,” u shpreh avokati.
Petraj kërkoi një reformim të thellë të sistemit të paraburgimit në vend, duke theksuar nevojën për përmirësimin e kushteve bazë të jetesës, përfshirë ushqimin, akomodimin dhe trajtimin e përgjithshëm të të ndaluarve. Ai sugjeroi që ushqimi të standardizohet përmes shërbimeve catering dhe të hiqet barra nga familjarët për furnizimin e të afërmve në burg.
Një tjetër çështje e ngritur prej tij ishte përdorimi i “kafazit të xhamtë” në sallat e gjyqit, të cilin e konsideroi si cenim të dinjitetit dhe burim presioni psikologjik për të paraburgosurit. Sipas Petrajt, kjo praktikë duhet të eliminohet.
Në lidhje me transparencën e proceseve gjyqësore, ai propozoi që çështjet me interes publik, veçanërisht ato që lidhen me luftën kundër korrupsionit, të transmetohen live, duke garantuar njëkohësisht mbrojtjen e dëshmitarëve.
Duke iu referuar rastit konkret, Petraj theksoi se Ilir Meta duhet të ketë mundësinë të përballet drejtpërdrejt me provat dhe dëshmitarët në procesin gjyqësor.
Ai shtoi se situata e Metës është e ndryshme nga ajo e Erion Veliaj, por në të dy rastet duhet të respektohen standardet e një procesi të rregullt ligjor dhe të drejtat themelore të të pandehurve.
Deklaratat e Petrajt rikthejnë në vëmendje debatin mbi kushtet në sistemin e paraburgimit dhe nevojën për reforma të thella në trajtimin e personave të ndaluar në Shqipëri.
