Ambasadori i SHBA në NATO, Matthew Whitaker, ka ndarë detaje nga vizita e tij në Shqipëri, duke theksuar rëndësinë e bashkëpunimit në fushën e mbrojtjes dhe zhvillimin e kapaciteteve ushtarake.
Në një postim në rrjetin social X, Whitaker bëri të ditur se zhvilloi një tur informues në Baza Ajrore e Kuçovës, së bashku me ministrin e Mbrojtjes Ermal Nufi. Ai vlerësoi progresin e Shqipërisë në forcimin e mbrojtjes kibernetike dhe angazhimin në misione ndërkombëtare të sigurisë.
Sa i përket takimit me kryeministrin Edi Rama, ambasadori theksoi se diskutimet u përqendruan te objektivi i vendosur nga presidenti amerikan Donald Trump për rritjen e shpenzimeve të mbrojtjes në nivelin 5% të Prodhimit të Brendshëm Bruto.
Whitaker nënvizoi se arritja e këtij objektivi do të hapte rrugë për zhvillime të mëtejshme, veçanërisht në drejtim të lëvizshmërisë ushtarake dhe rritjes së rolit të Shqipërisë brenda NATO.
Vizita e tij konsiderohet pjesë e përpjekjeve për të forcuar partneritetin strategjik mes Shqipërisë dhe Shteteve të Bashkuara, si dhe për të rritur kontributin e vendit në strukturat e sigurisë euroatlantike.
