Deputetja e Partisë së Lirisë, Erisa Xhixho, deklaroi se procesi i integrimit të Shqipërisë në Bashkimi Europian ndodhet në një moment kritik dhe të ndërlikuar.
Sipas saj, raporti i ndërmjetëm IBAR është një dokument kyç për ecurinë e negociatave dhe mbylljen e kapitujve, duke theksuar se pa këtë raport nuk mund të ketë progres konkret në proces. Ajo nënvizoi se integrimi nuk lidhet vetëm me miratimin formal të ligjeve, por mbi të gjitha me vullnetin politik dhe zbatimin real të standardeve në praktikë.
Xhixho ngriti shqetësime për kapitujt që lidhen me shtetin e së drejtës, drejtësinë, demokracinë dhe zgjedhjet, duke theksuar se pikërisht këto fusha po hasin më shumë vështirësi. Sipas saj, zhvillimet e fundit politike dhe vendimmarrjet në vend kanë ndikuar negativisht në perceptimin e partnerëve ndërkombëtarë për progresin e Shqipërisë.
Ajo përmendi gjithashtu reagimet e ambasadave të huaja, duke argumentuar se këto qëndrime tregojnë se ka ende pikëpyetje serioze mbi funksionimin e reformës në drejtësi dhe pavarësinë e institucioneve.
Në përfundim, deputetja theksoi se integrimi europian është një proces kompleks që kërkon jo vetëm reforma në letër, por zbatim të plotë dhe të besueshëm në praktikë, në mënyrë që Shqipëria të avancojë drejt anëtarësimit në BE.
