Komisionerja evropiane për zgjerimin, Marta Kos, ka dhënë një mesazh të qartë për procesin e integrimit të Shqipërisë në Bashkimi Evropian: nuk ekziston një rrugë e shkurtuar apo “anëtarësim i lehtësuar”.
Në një intervistë për Atlantic Council, ajo theksoi se Shqipëria ka mundësi reale për t’u bërë pjesë e BE-së edhe para vitit 2030, por vetëm nëse vijon me ritmin e reformave dhe përmbush të gjitha kriteret e kërkuara.
Kos u ndal edhe te ideja e një modeli të ndërmjetëm integrimi, e propozuar në një letër të përbashkët nga kryeministri Edi Rama dhe presidenti serb Aleksandar Vučić, duke e refuzuar qartë këtë qasje.
“Nuk ka anëtarësim ‘light’. Ose je anëtar dhe gëzon të gjitha të drejtat, ose nuk je,” deklaroi ajo, duke shtuar se roli i saj është të ndihmojë vendet kandidate të bëhen anëtare të plota dhe jo të krijojë modele alternative.
Sipas saj, procesi i zgjerimit mbetet i bazuar në meritë dhe në përmbushjen e standardeve të vendosura nga traktatet evropiane. Ajo nënvizoi gjithashtu se progresi i Shqipërisë dhe Malit të Zi është inkurajues, ndërsa ky i fundit mund të jetë vendi i radhës që i bashkohet BE-së.
Deklarata e Kos vjen në një moment kur debati për ritmin e integrimit dhe alternativat e mundshme është intensifikuar në rajon. Megjithatë, mesazhi i Brukselit mbetet i prerë: rruga drejt anëtarësimit kalon vetëm përmes reformave të plota dhe standardeve të qarta, pa kompromise politike.
