Deputeti i opozitës, Klevis Balliu, ka akuzuar qeverinë për përdorim të policisë si instrument politik për të shtypur protestuesit, pas përplasjes së ndodhur gjatë tubimit të fundit në Tiranë.
Pas një takimi me protestuesit e arrestuar, Balliu deklaroi se disa prej tyre paraqesin dëmtime serioze fizike. Ai përmendi rastin e një qytetari që, sipas tij, ka vështirësi në qëndrim në këmbë për shkak të dhunës së ushtruar gjatë arrestimit, si dhe një tjetër të riu që ka shenja të dukshme dhune në trup dhe në fyt.
Deputeti theksoi se shumë prej të ndaluarve kanë pasur probleme me sytë, të cilat i lidhi me përdorimin e gazit lotsjellës dhe mjeteve të tjera nga forcat e rendit.
Sipas tij, ndërhyrja e policisë nuk ka qenë një operacion i zakonshëm për ruajtjen e rendit, por një veprim i mirëorganizuar me prapavijë politike. Ai e cilësoi situatën si një përpjekje për të frikësuar qytetarët dhe për të penguar protestat.
Në vijim, Balliu njoftoi se do të propozojë në Komisionin e Sigurisë kryerjen e testit të drogës për efektivët e policisë që morën pjesë në ndërhyrje, duke ngritur dyshime mbi gjendjen e tyre gjatë operacionit.
Ai shtoi se opozita do të kërkojë përgjegjësi për çdo rast dhune dhe se, sipas tij, ngjarjet e fundit tregojnë një përshkallëzim të tensioneve politike në vend.
