Gjykata Kushtetuese e Shqipërisë ka zbardhur vendimin e saj për çështjen e pagave të magjistratëve, duke pranuar pjesërisht kërkesën e Unionit të Gjyqtarëve dhe duke vendosur që ata të përfitojnë rritje page njësoj si funksionarët e tjerë publikë.
Vendimi përfshin shfuqizimin e disa dispozitave të ligjit nr. 33/2023, të cilat lidhnin pagën e gjyqtarëve dhe prokurorëve me atë të Presidentit të Republikës, duke i cilësuar ato si të papajtueshme me Kushtetutën.
Gjykata ka detyruar Kuvendi i Shqipërisë që të miratojë ndryshimet e nevojshme ligjore brenda datës 31 korrik 2026, ndërsa efektet e vendimit do të hyjnë në fuqi me miratimin e këtyre ndryshimeve, por jo më vonë se kjo datë.
Institucioni i ka lënë Kuvendit të drejtën për të përcaktuar referencën konkrete mbi të cilën do të bazohet paga e magjistratëve, por ka theksuar se ata duhet të trajtohen në mënyrë të barabartë me funksionarët e tjerë sa i përket rritjes së pagave.
Sipas Gjykatës Kushtetuese, paga përbën një garanci themelore për pavarësinë e gjyqtarëve dhe duhet të jetë në përputhje me rëndësinë dhe dinjitetin e funksionit që ata ushtrojnë.
Në vendim theksohet gjithashtu se ligjvënësi duhet të shmangë çdo ulje të drejtpërdrejtë apo të tërthortë të pagave dhe të garantojë indeksimin e tyre në raport me inflacionin, në mënyrë që të ruhet vlera reale sipas kostos së jetesës.
