Ekspertët e UBS kanë identifikuar pesë faktorë kryesorë që do të përcaktojnë nëse armëpushimi mes Iranit dhe palëve të tjera do të jetë i qëndrueshëm apo jo.
Sipas analizës, megjithëse rënia e çmimeve të naftës pas armëpushimit ka lehtësuar presionin mbi inflacionin, pasiguritë mbeten të larta.
Së pari, shumë anije janë larguar nga zona e Ngushticës së Hormuzit dhe rikthimi i tyre kërkon kohë, duke ndikuar në furnizimin global me energji.
Së dyti, armëpushimi është vetëm dyjavor, çka rrit hezitimin e kompanive të transportit për të rifilluar normalisht aktivitetin në një zonë ende të pasigurt.
Së treti, ekziston pasiguri për respektimin e marrëveshjes nga Irani, sidomos në lidhje me mbajtjen e hapur të Ngushticës, një pikë kyçe për tregtinë botërore të naftës.
Së katërti, mbetet e paqartë se kush do të kontrollojë Ngushticën në të ardhmen dhe nëse do të vendosen tarifa tranziti, çka mund të krijojë tensione të reja në negociata.
Së fundmi, çështje të pazgjidhura si programi bërthamor i Iranit, sanksionet dhe garancitë e sigurisë nga SHBA-të pritet të jenë pengesa kryesore në arritjen e një marrëveshjeje afatgjatë.
Ekspertët paralajmërojnë se, megjithëse investitorët afatgjatë duhet të qëndrojnë të qetë, tregjet mund të mbeten të paqëndrueshme në periudhën afatshkurtër për shkak të këtyre pasigurive.
