Dy bashkëpunëtorët e drejtësisë, Nuredin Dumani dhe Erjon Alibej, janë përballur në GJKKO lidhur me vrasjen e Bujar Çela në Bradashesh.
Gjatë seancës, të dy kanë deklaruar se i qëndrojnë plotësisht dëshmive të dhëna më herët për këtë ngjarje.
Sipas rrëfimit të mëparshëm të Dumanit, ai ka qenë pjesë e grupit që synonte ekzekutimin e Çelës, së bashku me persona të tjerë, por arma e tij nuk ka funksionuar në momentin e sulmit.
Nga ana tjetër, Alibej ka deklaruar se vrasja ishte planifikuar në bashkëpunim me Dumanin, si pjesë e një serie përplasjesh kriminale dhe hakmarrjesh mes grupeve rivale.
Sipas dëshmive, objektivi ishte i lidhur me konfliktet e mëparshme kriminale, ndërsa pas ekzekutimit autorët janë larguar dhe kanë tentuar të fshijnë gjurmët, duke djegur automjetin dhe hedhur armët.
Çështja e njohur si pjesë e dosjes së krimit të organizuar mbetet një nga më kompleksat në vend, ndërsa ballafaqimi i dy të penduarve pritet të ndihmojë në zbardhjen e plotë të ngjarjes.
