Pretendimet që qarkulluan në rrjetet sociale për shtrimin në spital të Donald Trump janë hedhur poshtë nga Shtëpia e Bardhë, e cila i cilësoi ato si të pavërteta dhe të pabazuara.
Sipas thashethemeve që u përhapën gjerësisht online, Trump dyshohej se ishte dërguar në Walter Reed National Military Medical Center në Bethesda, Maryland. Megjithatë, nuk ka asnjë konfirmim zyrtar për një zhvillim të tillë.
Përkundrazi, burime nga mediat amerikane raportojnë se nuk është vërejtur asnjë aktivitet i pazakontë që do të mbështeste këto pretendime. Helikopteri presidencial nuk është parë në spital, ndërsa marinsat që qëndrojnë roje pranë Zyrës Ovale kanë qenë në vendin e tyre, një tregues se presidenti ka qenë në detyrë.
Po ashtu, vetë Trump ka qenë aktiv në rrjetet sociale, duke postuar gjatë ditës së djeshme, çka bie ndesh me pretendimet për një shtrim urgjent në spital.
Ky rast është një tjetër shembull i përhapjes së informacionit të pakonfirmuar në rrjetet sociale, që shpesh krijon konfuzion dhe keqinformim për opinionin publik.
