Në ceremoninë përkujtimore të 35-vjetorit të 2 prillit 1991 në Shkodër, kreu i Partisë Demokratike, Sali Berisha, theksoi se kjo ngjarje historike nisi si një revoltë kundër asaj që ai e cilësoi “farsë elektorale”.
Berisha nderoi katër viktimat e asaj dite, duke i quajtur martirë të votës së lirë dhe të demokracisë, dhe theksoi se sakrifica e tyre mbetet aktuale edhe sot.
Pas homazheve, ai mbajti një fjalim me tone të forta politike, duke sulmuar drejtpërdrejt Edi Rama. Sipas tij, qeveria aktuale përfaqëson një sistem që duhet përmbysur përmes protestave qytetare.
“Beteja kundër hajdutëve dhe pushtetit është beteja më e shenjtë e shqiptarëve”, u shpreh Berisha, duke bërë thirrje për një “kryengritje paqësore”.
Ai ftoi qytetarët e Shkodrës dhe të gjithë Shqipërisë që të mobilizohen për protesta, me synimin e rrëzimit të qeverisë.
Deklaratat e tij vijnë në një klimë të tensionuar politike, ku opozita ka intensifikuar retorikën dhe thirrjet për mobilizim publik në prag të zhvillimeve të rëndësishme politike në vend.
