Ndeshja historike mes Kosova dhe Turqia, që zhvillohet sonte në stadiumin “Fadil Vokrri” në Prishtinë, do të ndiqet edhe nga katër ish-drejtues të UÇK-së që ndodhen në paraburgim në Hagë.
Hashim Thaçi, Kadri Veseli, Rexhep Selimi dhe Jakup Krasniqi do ta ndjekin përballjen nga Qendra e Paraburgimit në Sheveningen, përmes transmetimit të Televizionit Publik të Kosovës.
Lajmi është konfirmuar nga Organizata e Veteranëve të Luftës së UÇK-së, e cila bëri të ditur se katërshja do të ketë mundësinë të përjetojë emocionet e këtij 90-minutëshi historik, pavarësisht se ndodhen larg vendit.
Sfida mes Kosovës dhe Turqisë, që nis në orën 20:45, konsiderohet një nga momentet më të rëndësishme për futbollin kosovar, pasi një fitore do t’i siguronte dardanëve kualifikimin e parë në një Kampionat Botëror.
