Kryeministri Edi Rama ka reaguar për rritjen e fundit të çmimit të naftës, duke sqaruar rolin e Bordit të Transparencës dhe mekanizmat që ndikojnë në përcaktimin e çmimeve në tregun vendas.
Gjatë podcastit të së dielës “Flasim”, Rama theksoi se Bordi nuk vendos çmime në mënyrë arbitrare, por ndjek drejtpërdrejt lëvizjet e tregjeve ndërkombëtare.
Sipas tij, çdo ndryshim në çmimin e karburanteve në Shqipëri është pasojë e zhvillimeve në bursat ndërkombëtare dhe jo vendime të njëanshme të operatorëve vendas.
“Ajo që është e rëndësishme të kuptohet është se ky mekanizëm lidh drejtpërdrejt çmimet në Shqipëri me tregjet ndërkombëtare”, u shpreh ai.
Kreu i qeverisë theksoi gjithashtu se, megjithëse në ditët e fundit është regjistruar një ulje e çmimeve të nënprodukteve të naftës në bursën e Mesdheut, çdo ndërhyrje për uljen e mëtejshme të çmimit duhet të bëhet me kujdes, në mënyrë që të mos rrezikohen kapacitetet e furnizimit.
Ai nënvizoi se roli kryesor i Bordit të Transparencës është të mbrojë konsumatorët nga abuzimet, duke vendosur kufij të qartë për çmimet dhe duke ndëshkuar operatorët që nuk respektojnë rregullat, deri në pezullimin e aktivitetit.
Në përfundim, Rama garantoi se qeveria do të vazhdojë të monitorojë situatën dhe të sigurojë transparencë, ndërsa theksoi se kjo krizë lidhet me faktorë globalë që nuk varen nga Shqipëria.
