Një tjetër zhvillim i fortë ka tronditur familjen mbretërore britanike, pasi King Charles III i ka kërkuar vëllait të tij, Prince Andrew, të largohet nga rezidenca e tij në Royal Lodge, në Windsor.
Sipas raportimeve ndërkombëtare, Andrew ka marrë një afat të prerë për të liruar rezidencën me 30 dhoma, ku kishte jetuar për më shumë se dy dekada. Procesi i largimit ka nisur tashmë, me kontejnerë dhe mjete transporti që po nxjerrin sendet personale nga prona.
Burime pranë zhvillimeve bëjnë me dije se rezidenca është drejt zbrazjes totale, ndërsa një pjesë e mobiljeve dhe sendeve të padëshiruara janë asgjësuar në vend. Stafi ka marrë përsipër përfundimin e procesit, pasi vetë Andrew nuk është parë të marrë pjesë në largimin e sendeve.
Ky vendim vjen në një moment të vështirë për Dukën e Jorkut, i cili është përfshirë sërish në polemika të lidhura me marrëdhënien e tij me financuesin e ndjerë Jeffrey Epstein.
Sipas pretendimeve të reja që burojnë nga dokumente të publikuara nga Departamenti i Drejtësisë në SHBA, Andrew dyshohet se ka ndarë informacione të ndjeshme lidhur me vizita zyrtare dhe mundësi investimi gjatë kohës që shërbente si i dërguar tregtar i Mbretërisë së Bashkuar.
Ndërkohë, autoritetet britanike po shqyrtojnë akuzat për sjellje të papërshtatshme në funksion publik, ndërsa presioni ndërkombëtar për të dëshmuar mbi lidhjet me Epstein vijon të rritet.
Prince Andrew i ka mohuar vazhdimisht akuzat ndaj tij, por nuk ka dhënë ende një reagim të drejtpërdrejtë për zhvillimet më të fundit.
Nga ana tjetër, Pallati Buckingham ka deklaruar se King Charles III mbështet plotësisht hetimet dhe se “ligji duhet të ndjekë rrugën e vet”, duke sinjalizuar një qëndrim më të ashpër ndaj çështjeve që prekin integritetin e monarkisë.
Largimi nga Royal Lodge shihet si një tjetër goditje për imazhin dhe statusin e Andrew, duke thelluar rënien e tij nga jeta publike dhe privilegjet mbretërore.
