Reshjet e dendura të shiut kanë shkaktuar përmbytje të mëdha dhe ndërprerje masive të energjisë elektrike në rajonin jugor rus të Dagestan, duke detyruar autoritetet të shpallin gjendjen e jashtëzakonshme.
Situata më e rënduar paraqitet në kryeqytetin Makhachkala, ku shërbimet emergjente janë vënë në gatishmëri të plotë për t’u ardhur në ndihmë banorëve të prekur nga përmbytjet dhe ndërprerjet e energjisë.
Sipas Ministrisë rajonale të Emergjencave, moti i keq ka lënë pa energji elektrike mbi 327 mijë persona. Në total, 283 vendbanime janë prekur nga ndërprerjet, duke përfshirë rreth 89 mijë fëmijë.
Autoritetet lokale bëjnë të ditur se ekipet e ndërhyrjes po punojnë për rikthimin e energjisë dhe menaxhimin e situatës në terren, ndërsa banorët janë paralajmëruar të tregojnë kujdes për shkak të përkeqësimit të kushteve atmosferike.
Udhëheqësi i rajonit, Sergei Melikov, deklaroi se janë marrë masa paraprake për përballimin e krizës, ndërsa pritet që situata të monitorohet në vijimësi në orët dhe ditët në vijim.
Kjo ngjarje rikthen vëmendjen te rreziku i përmbytjeve në zonat urbane dhe infrastruktura energjetike, e cila mbetet e ndjeshme ndaj kushteve ekstreme të motit.
