Izraeli po përgatitet për të paktën tre javë të tjera luftë kundër Iranit, ndërsa operacionet ushtarake pritet të intensifikohen në ditët në vijim.
Sipas zyrtarëve ushtarakë izraelitë, të cituar nga media The Times of Israel, fushata ushtarake që po zhvillohet në bashkëpunim me Shtetet e Bashkuara po përparon sipas planit dhe madje me një ritëm më të shpejtë nga sa ishte parashikuar.
Në fazën e ardhshme të operacioneve pritet të shtohen sulmet ndaj industrisë mbrojtëse iraniane, ndërsa paralelisht do të vazhdojnë përpjekjet për të reduktuar sulmet me raketa ndaj territorit izraelit.
Zëdhënësja e Forcave të Mbrojtjes së Izraelit (IDF), gjeneral brigade Effie Defrin, deklaroi për CNN se ushtria izraelite ka një plan të qartë për fazat e ardhshme të luftës.
“Kemi mijëra objektiva përpara nesh. Jemi të përgatitur, në koordinim me aleatët tanë amerikanë, me plane që shtrihen të paktën deri në festën hebraike të Pashkës dhe edhe për disa javë pas saj”, tha ajo.
Pas nisjes së sulmeve më 28 shkurt, operacionet izraelite u përqendruan fillimisht në shkatërrimin e lëshuesve të raketave balistike dhe sistemeve të mbrojtjes ajrore të Iranit.
Tani, sipas zyrtarëve izraelitë, objektivi kryesor është dobësimi sistematik i industrisë së mbrojtjes së Iranit, duke përfshirë kapacitetet për prodhimin e raketave balistike, sistemet e mbrojtjes ajrore, armët detare dhe teknologjitë satelitore.
Autoritetet izraelite theksojnë se operacioni aktual është shumë më i gjerë se konflikti 12-ditor i vitit të kaluar mes dy vendeve.
Sipas ushtrisë izraelite, synimi i kësaj fushate nuk është vetëm neutralizimi i kërcënimit bërthamor të Iranit, por edhe dobësimi afatgjatë i kapaciteteve strategjike ushtarake që konsiderohen rrezik për sigurinë e Izraelit.
