Kryetari i Partisë Demokratike, Sali Berisha, ka akuzuar kryeministrin Edi Rama se po përdor shumicën parlamentare për të bllokuar kërkesën për heqjen e imunitetit të deputetes socialiste Belinda Balluku.
Në nisje të mbledhjes së grupit parlamentar të PD, Berisha deklaroi se vendimi që pritet të merret në Kuvend do të shërbejë si mburojë për qeverinë dhe do të dëmtojë procesin e drejtësisë.
Sipas tij, Rama po përdor mandatet në Parlament për të mbrojtur veten dhe bashkëpunëtorët e tij nga hetimet.
Berisha u shpreh se ky veprim përbën një akt të rëndë politik dhe institucional, duke shtuar se një vendim i tillë mund të ndikojë edhe në procesin e integrimit të Shqipërisë në Bashkimin Europian.
Sipas kreut të opozitës, vendimi i mazhorancës për të mos miratuar kërkesën e SPAK për arrestimin e Ballukut përbën një pengesë për funksionimin normal të drejtësisë në vend.
