Telefonata mes presidentit amerikan Donald Trump dhe presidentit rus Vladimir Putin ka rikthyer Rusinë në qendër të diskutimeve ndërkombëtare për krizën me Iranin dhe ndikimin e saj në tregjet globale të energjisë.
Sipas mediave italiane, Putin po përpiqet të përfitojë nga situata e krijuar pas tensioneve në Lindjen e Mesme dhe bllokimit të mundshëm të Ngushticës së Hormuzit, që ka ndikuar në rritjen e çmimeve të naftës dhe gazit.
Pas bisedës me Trump, zëdhënësi i Kremlinit, Dmitrij Peskov, deklaroi se presidenti rus ka paraqitur disa propozime për ndërmjetësim në konfliktin me Iranin dhe se këto propozime janë ende në diskutim.
Edhe presidenti amerikan la të kuptohej për një rol të mundshëm të Rusisë në uljen e tensioneve, duke thënë se Putin “dëshiron të japë një dorë”, megjithëse shtoi se një kontribut i tillë do të ishte edhe më i rëndësishëm nëse Rusia do të ndihmonte për përfundimin e luftës në Ukrainë.
Sipas analistëve, Moska po përpiqet të paraqitet sërish si një aktor i rëndësishëm në diplomacinë e Lindjes së Mesme, edhe pse në vitet e fundit ka parë dobësimin e aleatëve të saj në rajon.
Putin kishte paralajmëruar më herët, gjatë një takimi me drejtues të kompanive energjetike ruse, se çdo destabilizim në rajon mund të shkaktojë një krizë të rëndë energjetike globale.
Ndërkohë, Shtetet e Bashkuara po shqyrtojnë mundësinë e një lehtësimi të pjesshëm të sanksioneve ndaj naftës ruse, duke lejuar përkohësisht disa vende, si India, të blejnë naftë ruse pa u përballur me tarifa ndëshkuese.
Para pushtimit të Ukrainës, Europa merrte më shumë se 40% të gazit të saj nga Rusia, ndërsa deri në vitin 2025 kjo shifër kishte rënë në rreth 13%. Megjithatë zhvillimet e fundit tregojnë se Rusia mund të rikthehet sërish si një faktor i rëndësishëm në tregjet globale të energjisë.
