Kryetari i Partisë Demokratike, Sali Berisha, mori pjesë në një aktivitet me gratë dhe vajzat demokrate me rastin e 8 Marsit – Ditës Ndërkombëtare të Gruas, ku vlerësoi rolin e tyre në politikë, familje dhe shoqëri.
Në fjalën e tij, Berisha theksoi se gratë shqiptare janë një nga shtyllat më të rëndësishme të opozitës, duke i cilësuar ato si “fibra kryesore e opozitës shqiptare dhe e Partisë Demokratike”.
Ai shprehu mirënjohje për kontributin e grave dhe vajzave në shoqëri, duke theksuar se puna dhe sakrificat e tyre shpesh janë më të mëdha se sa vlerësohen publikisht.
Sipas tij, gratë shqiptare përballen çdo ditë me sfida të shumta, duke kontribuar jo vetëm në profesionet e tyre, por edhe në organizimin dhe mirëqenien e familjes.
Berisha u ndal gjithashtu te çështja e barazisë gjinore, duke theksuar se patriarkia mbetet një pengesë historike për realizimin e plotë të të drejtave të grave.
“Muri i patriarkisë është dhunuesi më kryesor i të drejtave të njeriut kudo në botë,” u shpreh ai gjatë fjalës së tij.
Në përfundim, lideri i opozitës u bëri thirrje grave dhe vajzave që të vazhdojnë të jenë aktive në jetën politike dhe shoqërore.
“Në kilometrin e fundit kërkohet forca, energjia, guximi dhe vendosmëria e grave,” deklaroi Berisha, duke theksuar se angazhimi i tyre është i domosdoshëm për të ardhmen e vendit.
