Policia ka arrestuar autorin e dyshuar të vrasjes së 48-vjeçarit Alket Isufi, ngjarje e ndodhur në lagjen nr. 3 të Kavajë.
Në pranga është vënë 48-vjeçari Land Drejai (i identifikuar nga policia si L. D., alias L. P.), banues në të njëjtën zonë.
Si ndodhi ngjarja
Sipas njoftimit zyrtar, më 21.02.2026, rreth orës 14:22, gjatë një konflikti për motive të dobëta – që dyshohet të ketë nisur për një vend parkimi – autori ka goditur disa herë me mjet prerës (thikë) 48-vjeçarin, i cili si pasojë e plagëve të marra humbi jetën.
Pas ngjarjes, i dyshuari është larguar nga banesa, por pas disa orësh kërkimesh intensive u bë i mundur lokalizimi dhe arrestimi i tij.
Provat materiale
Në cilësinë e provës materiale është sekuestruar thika që dyshohet se është përdorur në krim.
Operacioni u realizua nga:
- Shërbimet e Komisariatit të Policisë Kavajë
- Forcat e Posaçme “Shqiponjat”
- Forcat Operacionale të DVP Durrës
Materialet procedurale i janë referuar Prokurorisë së Durrësit për veprime të mëtejshme, ndërsa grupi hetimor vijon punën për sqarimin e plotë të rrethanave të ngjarjes.
