Kryeministri izraelit Benjamin Netanyahu ka deklaruar se programi bërthamor i Iranit duhet të shkatërrohet plotësisht, duke paralajmëruar se nëse negociatat mes Teheranit dhe Shteteve të Bashkuara dështojnë, Izraeli është i gatshëm të ndërmarrë sulme.
Sipas raportimeve ndërkombëtare, presidenti amerikan Donald Trump i ka shprehur mbështetje Izraelit për veprime të mundshme ndaj programit të raketave balistike iraniane, në rast se nuk arrihet një marrëveshje diplomatike.
Netanyahu theksoi se çdo marrëveshje duhet të përfshijë largimin e të gjithë materialit të pasuruar nga Irani dhe çmontimin e infrastrukturës së pasurimit të uraniumit. Ai kërkoi gjithashtu inspektime të plota dhe efektive, pa paralajmërim, si dhe përfshirjen në marrëveshje të programit të raketave balistike dhe mbështetjes së Iranit për grupet e armatosura në rajon.
Ndërkohë, ministri i Jashtëm iranian pritet të marrë pjesë në një raund të ri negociatash në Gjenevë për programin bërthamor. Bisedimet mes SHBA-së dhe Iranit, të rifilluara në fillim të shkurtit në Oman, synojnë rikthimin e dialogut pas ndërprerjes së mëparshme.
Zhvillimet e ardhshme në tryezën e negociatave pritet të jenë vendimtare për situatën e sigurisë në Lindjen e Mesme.
