Ish-deputeti Ervin Salianji ka vijuar kritikat e forta ndaj lidershipit të Partisë Demokratike, duke akuzuar Sali Berishën se po spastron partinë nga kundërshtarët dhe po e mban opozitën të bllokuar në stanjacion. Gjatë një takimi me demokratët në Fier, Salianji deklaroi se mungesa e garës së brendshme dhe përjashtimet e vazhdueshme po e dobësojnë PD-në dhe po i shërbejnë drejtpërdrejt interesave të Edi Ramës.
Sipas tij, partia është kthyer në një strukturë të mbyllur ku vendimet merren nga pak individë, ndërsa demokratët përjashtohen nga listat dhe proceset vendimmarrëse. Salianji theksoi se PD nuk është pronë personale dhe se vetëm bashkimi real i opozitës mund të sjellë ndryshimin politik në vend.
Ai shtoi se kushdo që ka aftësinë të bashkojë opozitën dhe të fitojë besimin e qytetarëve duhet të propozohet edhe si kandidat për kryeministër, pa komplekse dhe pa frikë. Sipas Salianjit, frika nga gara dhe ndryshimi është arsyeja kryesore pse opozita ka dështuar të vijë në pushtet.
