Kreu i Partisë Demokratike, Sali Berisha, ka sulmuar ashpër gjyqtaren Irena Gjoka pas paraqitjes së tij në SPAK. Në një deklaratë për mediat, Berisha tha se falsifikimi i vizës nga ana e Gjokës është fakt i provuar dhe se ekzistojnë prova filmike që dokumentojnë lidhjet e saj me biznesmenin Ergys Agasi.
Sipas Berishës, videot ku gjyqtarja hyn dhe del nga zyra e Agasit ndodhen në dosjet e SPAK dhe provojnë konflikt të hapur interesi. Ai e cilësoi Gjokën si “këshilltare të Agasit” dhe e akuzoi për shkelje të rëndë të ligjit dhe standardeve të drejtësisë.
Berisha përdori gjuhë të ashpër, duke e quajtur sjelljen e saj një precedent të papranueshëm në historinë e sistemit gjyqësor shqiptar dhe theksoi se raste të tilla tregojnë, sipas tij, kapjen e drejtësisë nga interesa mafioze.
Kreu i opozitës deklaroi se këto fakte nuk do të kalojnë pa u hetuar dhe kërkoi që institucionet e drejtësisë të veprojnë, duke paralajmëruar se çështja do të ndiqet deri në fund.
