Ish-deputeti i Partisë së Lirisë, Petrit Vasili, ka reaguar ashpër ndaj mazhorancës qeverisëse përmes një postimi në rrjetet sociale, duke e cilësuar atë si “mazhorancë rrugaçësh” që, sipas tij, po përdor Kodin Penal për të frikësuar dhe dekurajuar protestat qytetare.
Vasili thekson se, vetëm pak ditë më parë, Kuvendi miratoi një paketë të gjerë ndryshimesh në Kodin Penal, por shmangu qëllimisht ndryshimin e Nenit 262, i cili ka të bëjë me tubimet dhe protestat. Ky nen, sipas tij, është pjesërisht i shfuqizuar që prej qershorit të vitit 2021, kur Gjykata Kushtetuese vendosi heqjen e paragrafit që kërkonte leje paraprake nga policia për zhvillimin e protestave, duke detyruar Kuvendin që ta përshtaste ligjin brenda gjashtë muajve nga shpallja e vendimit.
Sipas Vasilit, ky detyrim kushtetues nuk është respektuar asnjëherë. Ai kujton se në vitin 2022 një grup deputetësh të LSI depozituan një projektligj që synonte zbatimin e vendimit të Gjykatës Kushtetuese, por ky projektligj u rrëzua në vitin 2023 me 75 vota kundër nga deputetët e mazhorancës.
Vasili akuzon qeverinë se refuzimi për të ndryshuar Nenin 262 nuk është i rastësishëm, por ka për qëllim mbajtjen e qytetarëve nën kërcënim të vazhdueshëm ligjor, duke penguar ushtrimin e të drejtës për protestë dhe duke hapur rrugë për ndjekje penale ndaj tyre.
Sipas tij, përdorimi i Kodit Penal si mjet presioni përbën shkelje të hapur të rendit kushtetues dhe një tentativë për të heshtur zërin qytetar. Ai e cilëson këtë sjellje si mungesë respekti ndaj ligjit dhe demokracisë, duke shtuar se kjo “rrugaçëri institucionale” nis nga Ministria e Drejtësisë dhe përfundon në Kuvend.
Në videon e publikuar bashkë me reagimin e tij, Vasili rikujton momentin e votimit në vitin 2023, kur 75 deputetë të mazhorancës votuan kundër projektligjit për ndryshimin e Nenit 262 të Kodit Penal.
