Një tragjedi e rëndë është regjistruar në Republikën Demokratike të Kongos, ku më shumë se 200 persona kanë humbur jetën pas shembjes së një miniere në qytetin Rubaya, në rajonin lindor të vendit.
Sipas autoriteteve lokale të kontrolluara nga rebelët, miniera u shemb si pasojë e reshjeve të rrëmbyeshme të shiut që goditën zonën gjatë ditëve të fundit. Një zëdhënës i guvernatorit rebel të Kivusë Veriore konfirmoi bilancin tragjik, duke shtuar se operacionet e kërkim-shpëtimit janë vështirësuar ndjeshëm nga kushtet e terrenit.
Rreth 20 persona kanë arritur të mbijetojnë dhe po marrin trajtim mjekësor në spitalet e zonës, ndërsa autoritetet paralajmërojnë se numri i viktimave mund të rritet, pasi shumë trupa ende nuk janë nxjerrë nga rrënojat.
Mes viktimave raportohet se ka pasur gra dhe fëmijë, të cilët punonin në nxjerrjen e koltanit, një mineral strategjik që përdoret gjerësisht në prodhimin e pajisjeve elektronike si telefonat inteligjentë dhe kompjuterët.
Një ish-mbikëqyrës i minierës ka deklaruar se objekti nuk mirëmbahej sipas standardeve të sigurisë, çka e ka bërë shembjen më të mundshme dhe ka penguar ndërhyrjen e shpejtë të ekipeve të shpëtimit.
Guvernatori rebel Erasto Bahati Musanga, i emëruar nga grupi M23 pasi ky i fundit mori kontrollin e zonës, vizitoi të mbijetuarit dhe familjarët e viktimave. Rubaya është një nga zonat strategjike nën kontrollin e rebelëve të M23, të cilët sipas vëzhguesve ndërkombëtarë mbështeten nga Ruanda fqinje.
Minierat e Rubaya-s përmbajnë rreth 15% të furnizimit botëror me koltan dhe përbëjnë afro gjysmën e rezervave të këtij minerali në Republikën Demokratike të Kongos, duke e bërë zonën një pikë kyçe ekonomike, por edhe një nga më të rrezikshmet për punëtorët.
