Dita e parë e samitit trepalësh mes Rusisë, Ukrainës dhe Shteteve të Bashkuara në Abu Dhabi u mbyll pa ndonjë rezultat konkret, pavarësisht deklaratave formale për progres dhe optimizëm diplomatik. Palët dhanë mesazhe të kujdesshme, ndërsa çështjet thelbësore mbetën të pazgjidhura.
Delegacioni ukrainas bëri të ditur se diskutimet u fokusuan te parametrat për një paqe të drejtë dhe të qëndrueshme, ndërsa përfaqësuesit amerikanë e cilësuan takimin si produktiv. Nga ana tjetër, Rusia përsëriti se mbetet e lidhur ngushtë me marrëveshjet e mëparshme dhe nuk ka ndryshuar qëndrim për kushtet bazë të paqes.
Sipas Moskës, kontrolli i plotë i Donbasit dhe tërheqja e forcave ukrainase nga territori mbetet kusht i panegociueshëm për çdo marrëveshje afatgjatë. Ukraina ka theksuar se çështja territoriale është në qendër të bisedimeve dhe përbën pikën më të vështirë të negociatave aktuale.
Takimi ballë për ballë në Abu Dhabi përbën gjithsesi një hap të rëndësishëm diplomatik, pasi më herët kontaktet zhvilloheshin kryesisht përmes ndërmjetësve. Bisedimet pritet të vijojnë edhe gjatë ditës së sotme, megjithëse pritshmëritë për një marrëveshje të shpejtë mbeten të ulëta.
Ndërkohë, situata në terren nuk ka ndryshuar. Lufta vazhdon me intensitet, ndërsa Ukraina po përballet me krizën më të rëndë energjitike që nga nisja e konfliktit, si pasojë e sulmeve ndaj infrastrukturës kritike.
Paralelisht me negociatat politike, po diskutohen edhe plane afatgjata për rindërtimin e Ukrainës pas luftës, por për momentin, bisedimet në Abu Dhabi kanë treguar se rruga drejt paqes mbetet e vështirë dhe e pasigurt.
