Kryetari i Partisë Demokratike, Sali Berisha, e ka cilësuar ditën e djeshme si një nga më të errëtat për shtetin e së drejtës në Shqipëri, pas seancës së zhvilluar në Gjykatën Kushtetuese lidhur me masën e pezullimit nga detyra të zv/kryeministres Belinda Balluku.
Në një deklaratë për mediat, Berisha tha se për herë të parë në historinë e vendit, tre drejtuesit më të lartë të shtetit – Kryeministri Edi Rama, Presidenti Bajram Begaj dhe përfaqësues të mazhorancës – u paraqitën në Gjykatën Kushtetuese kundër një vendimi të dhënë nga një gjykatë dhe një prokurori, duke e cilësuar këtë veprim si një akt të paprecedent dhe të rrezikshëm për demokracinë.
Sipas Berishës, kjo lëvizje përbën një ndërhyrje të drejtpërdrejtë të pushtetit politik në sistemin e drejtësisë, me qëllim mbrojtjen e një zyrtareje të lartë të qeverisë, e cila sipas tij është e përfshirë në afera të rënda korruptive.
“Dje u shfaq para shqiptarëve një serial i hapur i hajdutëve dhe kryehajdutëve. Rama, Peleshi dhe Begaj u paraqitën në Gjykatën Kushtetuese për t’i bërë presion drejtësisë, në mbrojtje të zv/kryeministres së kapur në flagrancë me vjedhje monstruoze,” u shpreh Berisha.
Ai theksoi se mbështetja ndaj Ballukut nuk lidhet me respektimin e ligjit, por me frikën e drejtuesve të mazhorancës se edhe vetë ata mund të përballen me drejtësinë për çështje të ngjashme. Sipas tij, ky është një akt që cenon rëndë ndarjen e pushteteve dhe dëmton besimin e qytetarëve te institucionet.
Berisha akuzoi gjithashtu Gjykatën Kushtetuese se është vënë në shërbim të pushtetit politik dhe paralajmëroi se opozita do të vazhdojë betejën për mbrojtjen e pavarësisë së drejtësisë dhe ndëshkimin e korrupsionit në nivelet më të larta të qeverisjes.
“Një ditë e tillë do të mbetet si njollë në historinë e institucioneve të vendit. Askush nuk është mbi ligjin dhe koha e llogaridhënies po vjen,” përfundoi Berisha.
