Katër ditë pas datës së planifikuar të ekzekutimit dhe pavarësisht deklarimeve zyrtare se dënimi ishte shtyrë, fati i protestuesit iranian Erfan Soltani mbetet ende i paqartë. Autoritetet iraniane nuk kanë dhënë asnjë informacion zyrtar mbi vendndodhjen apo gjendjen e tij.
Mediat izraelite, duke iu referuar burimeve brenda Teheranit, raportojnë se Soltani mund të ketë humbur jetën në burg. Fillimisht u pretendua se ai ishte ekzekutuar, ndërsa më pas u publikuan informacione se protestuesi dyshohet të jetë rrahur për vdekje brenda qelisë së tij.
Familjarët e Soltanit kanë kërkuar prova të menjëhershme dhe të besueshme që ai është gjallë, duke theksuar se prej ditësh nuk kanë asnjë kontakt dhe nuk marrin përgjigje nga autoritetet. Mungesa totale e informacionit ka shtuar frikën se ai mund të jetë viktimë e dhunës në burg.
Rasti i Erfan Soltanit ka marrë edhe vëmendje ndërkombëtare, pasi është përdorur si simbol i shtypjes së protestave në Iran. Presioni diplomatik ndaj Teheranit është rritur, ndërsa nuk përjashtohet që çështja të ngrihet në mënyrë zyrtare përmes kanaleve ndërkombëtare në ditët në vijim.
Deri në këtë moment, Irani nuk ka dhënë asnjë sqarim zyrtar mbi fatin e protestuesit, ndërsa raportimet kontradiktore dhe mungesa e transparencës po thellojnë shqetësimin për shkelje të rënda të të drejtave të njeriut.
