Tetë persona të arrestuar në lidhje me arratisjen e bujshme të Altin Ndocit nga spitali i Durrësit do të dalin sot, më 17 janar, para Gjykatës së Durrësit për t’u njohur me masat e sigurisë. Çështja ka ekspozuar dështime të rënda në sistemin e sigurisë dhe ka çuar në shkrirjen e gjithë zinxhirit komandues të institucionit përkatës.
Mes të arrestuarve janë kryeinfermieri Aulon Çuko dhe zëvendësshefi i komanduar i policisë së burgut, Desdemon Pazaj, si dhe pesë efektivë të policisë së shoqërimit: Dorjan Saraçi, Sal Ferollari, Preng Marvataj, Fatjon Baçi dhe Aranit Çela. Në pranga ka rënë gjithashtu edhe Violeta Uka, përgjegjëse për njoftimin e sallave operative gjatë procesit të shoqërimit.
Hetimet kanë zbuluar mangësi serioze në zbatimin e procedurave të sigurisë gjatë transportimit dhe ruajtjes së të paraburgosurit, duke ngritur dyshime për neglizhencë të rëndë apo përfshirje të drejtpërdrejtë në arratisje.
Një ditë më parë, në kuadër të të njëjtit operacion, u arrestua edhe ish-drejtori i burgut të Durrësit, Indrit Cerloj, çka e ka thelluar edhe më shumë skandalin dhe ka vënë në pikëpyetje funksionimin e strukturave drejtuese.
Seanca e sotme pritet të jetë vendimtare për përcaktimin e përgjegjësive penale, ndërsa arratisja e Ndocit vijon të konsiderohet si një nga dështimet më të rënda të sistemit të burgjeve dhe sigurisë në vitet e fundit.
