Janë bërë publike detaje të reja nga hetimi mbi vjedhjen dhe shpërndarjen e dosjeve hetimore të SPAK, një çështje që ka ngritur pikëpyetje të forta mbi mënyrën se si u ndërtua procedimi penal dhe akuzat e ngritura ndaj personave të përfshirë.
Sipas materialeve të referuara, dosjet hetimore që lidhen me emra të njohur të politikës dhe biznesit janë hakeruar nga Arnold Rrokaj, një veprim i paligjshëm dhe i dënueshëm penalisht. Më pas, këto materiale i janë kaluar Zambak Gjonit, ish-drejtor i Burgut të Vlorës, i cili dyshohet se i ka shpërndarë përmes aplikacionit WhatsApp tek persona të ndryshëm, përfshirë edhe gazetarë.
Një nga gazetarët që ka marrë materialet, sipas burimeve të përfshira në dosje, ka njoftuar menjëherë drejtuesit e SPAK, duke dorëzuar edhe pajisjen telefonike për verifikim. Pas këtij veprimi, SPAK ka regjistruar procedim penal, duke përfshirë edhe akuzën për “grup të strukturuar kriminal”.
Pikërisht kjo akuzë ka nxitur debat publik dhe juridik. Juristë dhe analistë theksojnë se për ekzistencën e një grupi të strukturuar kriminal kërkohen elementë të qartë organizimi, hierarkie dhe qëllimi të përbashkët kriminal, të cilat, sipas kritikëve, nuk janë lehtësisht të provueshme vetëm me dy persona të përfshirë.
Në këtë kontekst, në dosje është përfshirë edhe ish-drejtori i Burgjeve, Agim Ismailaj, për shkak të komunikimeve që ai ka pasur me Zambak Gjonin. Sipas materialeve hetimore, Ismailaj ka marrë disa dokumente dhe ka bërë komente mbi përmbajtjen e tyre, përfshirë interesimin nëse SPAK kishte hetime ndaj zyrtarëve të tjerë të lartë.
Megjithatë, kritikët e procedimit argumentojnë se këto komunikime, në vetvete, nuk përbëjnë domosdoshmërisht prova për pjesëmarrje në një grup të strukturuar kriminal, por më tepër marrëdhënie informale mes individësh. Ata ngrenë dyshime se përfshirja e një personi të tretë ka pasur si efekt mbajtjen e çështjes në kompetencë të SPAK dhe jo transferimin e saj në Prokurorinë e Tiranës.
Hetimi mbetet në zhvillim, ndërsa çështja ka hapur një debat të gjerë mbi kufijtë e akuzave penale, standardet e provës dhe mënyrën se si trajtohen dosjet sensitive që lidhen me sistemin e drejtësisë.
