Kryeministri Edi Rama do të mbledhë këtë të premte Grupin Parlamentar të Partisë Socialiste, në një takim të gjatë që pritet të zgjasë rreth pesë orë. Mbledhja zhvillohet në Pallatin e Brigadave dhe vjen vetëm pak ditë para hapjes së sesionit të ri parlamentar për vitin 2026.
Takimi shihet si një moment kyç për mazhorancën, ku do të bëhet bilanci i punës së deritanishme dhe do të përcaktohet strategjia politike për muajt në vijim. Rama pritet të japë mesazhe të forta për disiplinën parlamentare, performancën e deputetëve dhe prioritetet ligjore të qeverisë.
Në rendin e ditës janë parashikuar raportime nga të gjitha komisionet parlamentare, si dhe diskutime të shkurtra nga deputetët. Në fund të mbledhjes, fjalën përmbyllëse do ta mbajë vetë kryeministri, i cili pritet të vendosë theksin te reformat, situata politike dhe përgatitjet për sfidat e vitit 2026.
Një ditë më pas, Rama do të zhvillojë një tjetër takim të rëndësishëm, këtë herë me kryetarët e bashkive, duke sinjalizuar një koordinim të plotë mes pushtetit qendror dhe atij vendor.
