Autoritetet pritet të nisin së shpejti aksionin e kërkim-shpëtimit për dy barinj që prej më shumë se një dite kanë mbetur të izoluar në një zonë të hapur me prezencë uji në Hasturkas të Fierit.
Kreu i Emergjencave Civile, Haki Çako, deklaroi për mediat nga vendngjarja se situata po monitorohet nga afër dhe se faza e parë e kërkimit do të realizohet përmes përdorimit të dronit termik, me qëllim lokalizimin e tyre.
Sipas Çakos, në rast se droni nuk jep rezultate konkrete, do të aktivizohen alternativa të tjera, përfshirë përdorimin e helikopterit dhe angazhimin e forcave të ushtrisë, për të vijuar kërkimet në terren.
Operacioni pritet të nisë sapo të krijohen kushtet e duhura teknike dhe të sigurisë, ndërsa autoritetet theksojnë se prioritet mbetet shpëtimi i jetës së dy barinjve dhe shmangia e çdo rreziku shtesë për ekipet e ndërhyrjes.
