Deputeti i Partisë Demokratike, Belind Këlliçi, u paraqit sot në Prokurorinë e Posaçme Kundër Korrupsionit dhe Krimit të Organizuar (SPAK), ku u mor në pyetje për një çështje që ai vetë e cilësoi si procedurale dhe pa rëndësi të veçantë.
Sipas burimeve mediatike, një nga temat për të cilat Këlliçi është pyetur lidhet me Kuvendin e Rithemelimit të vitit 2021, proces politik i zhvilluar pas përplasjes së fortë brenda Partisë Demokratike. Në atë kohë, Këlliçi ka qenë një nga organizatorët dhe figurat më aktive të këtij procesi.
Ajo që e bën çështjen më të ndërlikuar politikisht është fakti se kallëzimi penal për këtë rast është depozituar pikërisht në vitin 2021 nga Gazment Bardhi, në cilësinë e Sekretarit të Përgjithshëm të Partisë Demokratike. Aktualisht, Bardhi mban postin e kryetarit të grupit parlamentar të PD-së dhe konsiderohet si një nga figurat me peshë në rivalitetet e brendshme të opozitës.
Dokumenti i kallëzimit, i bërë publik, tregon se kallëzues është Partia Demokratike e Shqipërisë, e përfaqësuar nga Gazment Bardhi. Objekti i kallëzimit lidhet me veprën penale të “falsifikimit të vulave, stampave ose formularëve”, të kryer në bashkëpunim.
Në listën e personave të kallëzuar përfshihen Belind Këlliçi, Edmond Spaho, Albana Vokshi, Ivi Kaso, Ervin Minarolli, si dhe persona të tjerë ende të paidentifikuar, për të cilët thuhet se mund të dalin përgjegjësi penale gjatë hetimit.
Çështja pritet të vijojë në SPAK, ndërsa mbetet për t’u parë nëse hetimi do të ketë pasoja të mëtejshme ligjore apo politike.
