Vendimi i Gjykatës së Posaçme për caktimin e masave të sigurisë ndaj të akuzuarve për aferën e tenderave të AKSHI-t ka nxjerrë në pah, sipas materialeve hetimore, edhe elementë që lidhen me vjedhjen e databazës së sistemit TIMS të Policisë së Shtetit, ngjarje e ndodhur më 2 gusht 2023.
Në dosje shfaqen të paktën dy persona që, sipas hetimeve, dyshohet se kanë pasur role apo lidhje në të dyja çështjet: tenderat e AKSHI-t dhe komprometimin e sistemit TIMS.
Roli i Ervina Gjanës
Një nga emrat e përmendur është Ervina Gjana, e emëruar Drejtore e Drejtorisë për Hetimin e Krimeve Kibernetike pikërisht më 2 gusht 2023, në ditën kur dyshohet se është kryer vjedhja e të dhënave të TIMS-it.
Në dosjen hetimore përfshihen edhe materiale filmike dhe transkripte bisedash, ku përmendet emri i saj në kontekstin e një aksioni policor. Hetuesit dyshojnë se përmes kësaj strukture janë vënë në lëvizje mekanizma shtetërorë për ndërhyrje selektive ndaj subjekteve të caktuara.
Emërimi i Gjanës në këtë detyrë ka ngritur pikëpyetje edhe për shkak të procedurës së ndjekur, pasi ajo ka formim në inxhinieri informatike, ndërkohë që drejtoria që drejton ka funksione hetimore. Në kuadër të hetimeve të SPAK për AKSHI-n, BKH ka kryer kontrolle edhe në banesën e saj dhe të bashkëshortit, për të verifikuar lidhje të mundshme me persona të tjerë të përfshirë në hetim.
Klodian Mazari dhe lidhja me AKSHI-n
Personazhi i dytë që del në dosje është Klodian Mazari, i cili sipas hetimeve ka qenë një nga personat civilë që kanë hyrë në ambientet e Policisë së Shtetit më 2 gusht 2023, gjatë operacionit ku u kopjuan të dhënat e sistemit TIMS.
Në dokumentet e hetimit për tenderat e AKSHI-t, Mazari rezulton të ketë qenë Kryetar i Komisionit të Shqyrtimit të Ankesave pranë AKSHI-t. Sipas SPAK, ai dhe dy anëtarë të tjerë të këtij komisioni kanë shqyrtuar dhe rrëzuar një ankesë të paraqitur nga kompania “Advanced Business Solution”, duke përdorur, sipas hetimit, një arsyetim të pabazuar ligjërisht.
Hetuesit vlerësojnë se vendimmarrja e komisionit ka qenë në shkelje të ligjit dhe ka shërbyer për të favorizuar një grup të caktuar interesash që dyshohet se ka kontrolluar tenderat e AKSHI-t.
Dyshime për strukturë të organizuar
Sipas përmbledhjes së dosjes, prania e këtyre dy emrave në të dyja hetimet forcon dyshimet se vjedhja e të dhënave të sistemit TIMS nuk ka qenë një akt i izoluar, por pjesë e një veprimtarie të organizuar kriminale, me lidhje të thella brenda institucioneve shtetërore.
Hetimet ngrenë dyshime se bëhet fjalë për një rrjet më të gjerë, që mund të ketë pasur akses dhe interes për të dhëna sensitive dhe sekrete të institucioneve publike, duke i përdorur ato për përfitime kriminale apo ekonomike.
SPAK dhe BKH vijojnë hetimet për zbardhjen e plotë të rolit të secilit person dhe për të përcaktuar përgjegjësitë penale në të dyja çështjet.
