Zyrtarë amerikanë dhe rusë do të zhvillojnë sot në Florida një raund të ri bisedimesh që synojnë dhënien fund të luftës në Ukrainë, në kuadër të përpjekjeve të administratës së presidentit amerikan Donald Trump për arritjen e një marrëveshjeje paqeje mes Moskës dhe Kievit.
Takimi vjen një ditë pas konsultimeve që Shtetet e Bashkuara zhvilluan me përfaqësues të Ukrainës dhe vendeve evropiane, ku u diskutua një plan i mundshëm paqeje. Këto bisedime kanë rritur shpresat për një zgjidhje të konfliktit, i cili nisi në shkurt të vitit 2022 me pushtimin e plotë të Ukrainës nga Rusia.
Delegacioni rus kryesohet nga i dërguari i posaçëm i presidentit Vladimir Putin, Kirill Dmitriev, i cili pritet të takohet me Steve Witkoff, një biznesmen amerikan i përfshirë në diplomacinë joformale, si edhe me Jared Kushner, dhëndri i presidentit Trump. Diplomati më i lartë amerikan dhe këshilltari për sigurinë kombëtare, Marco Rubio, ka deklaruar se ekziston mundësia që edhe ai t’i bashkohet bisedimeve.
Takime të ngjashme janë zhvilluar më parë në klubin e golfit të Witkoff në zonën Hallandale Beach, pranë Miamit.
Zyrtarë amerikanë, ukrainas dhe evropianë kanë raportuar gjatë kësaj jave për përparim sa i përket garancive të sigurisë për Ukrainën, por mbetet ende e paqartë nëse kushtet e diskutuara do të pranohen nga pala ruse.
Ndërkohë, një burim rus ka bërë të ditur se çdo takim i drejtpërdrejtë mes delegacionit rus dhe përfaqësuesve ukrainas është përjashtuar në këtë fazë të negociatave.
