Ish-deputeti i Partisë Demokratike dhe një nga emrat më të votuar të listës së hapur në Qarkun e Elbasanit, Qani Xhafa, ka reaguar ashpër ndaj deklaratave të Sali Berishës lidhur me takimin e zhvilluar nga Ervin Salianji në Elbasan, duke i cilësuar ato si shpifje, gënjeshtra të rënda dhe të turpshme ndaj demokratëve të këtij qyteti.
Në një reagim publik të drejtpërdrejtë, Xhafa hedh poshtë kategorikisht pretendimet se takimi ishte i sponsorizuar nga krimi apo se pjesëmarrësit ishin detyruar të merrnin pjesë nën presion. Sipas tij, këto akuza nuk kanë asnjë bazë dhe përbëjnë një fyerje të rëndë për anëtarët dhe simpatizantët e PD-së në Elbasan.
“Mos shpif për demokratët e Elbasanit. Askush nuk është detyruar të marrë pjesë në atë takim. Janë gënjeshtra të rënda, turp të vijë”, shprehet Xhafa, duke theksuar se ai vetë ka qenë i pranishëm në takim me vullnet të plotë, si një demokrat që prej vitit 2005 dhe pa asnjë lloj presioni.
Ish-deputeti sqaron se realiteti ka qenë krejt i kundërt nga ai që pretendohet publikisht. Sipas tij, shumë demokratë janë shprehur të pakënaqur që nuk janë njoftuar në kohë për zhvillimin e aktivitetit, duke kërkuar llogari pse nuk ishin ftuar, çka rrëzon çdo alibi për pjesëmarrje të imponuar apo të organizuar me presion.
Xhafa kritikon gjithashtu gjendjen aktuale të Partisë Demokratike pas zgjedhjeve të 11 majit 2025, duke e cilësuar atë si një gjendje letargjie politike që po e dëmton rëndë opozitën dhe po largon bazën demokrate nga angazhimi aktiv. Ai thekson se takime të tilla janë të domosdoshme për të rikthyer frymën politike, debatin dhe mobilizimin e strukturave në bazë.
Në një sfidë të drejtpërdrejtë ndaj Berishës, Xhafa shprehet se është i gatshëm të tërhiqet nga çdo qëndrim i tij vetëm nëse paraqiten prova konkrete që vërtetojnë akuzat për përfshirje të krimit në këtë aktivitet. Në të kundërt, ai kërkon ndaljen e menjëhershme të gjuhës së akuzave që, sipas tij, po përçajnë dhe po dëmtojnë Partinë Demokratike nga brenda.
“Demokratët nuk janë pengje dhe nuk mund të përdoren si mish për luftëra të brendshme politike”, thekson Xhafa, duke shtuar se përplasjet dhe etiketimet pa fakte po i shërbejnë vetëm qeverisë së Edi Ramës.
Në përfundim, ish-deputeti bën thirrje për respekt ndaj bazës, transparencë dhe unitet, duke nënvizuar se Partia Demokratike nuk mund të pretendojë të rikthehet si alternativë qeverisëse duke baltosur njerëzit e saj. Sipas tij, vetëm një PD e hapur, që dëgjon zërat kritikë dhe mbështet demokratët e ndershëm, mund të rikthejë besimin e qytetarëve dhe të përballet realisht me qeverinë aktuale.
