Kreu i Partisë Demokratike, Sali Berisha, ka publikuar sot materiale të reja që ai i cilëson si përgjime nga dosja hetimore e Belinda Ballukut, të cilat sipas tij lidhen me procedurat e tenderave të Unazës së Madhe të Tiranës.
Në një deklaratë për mediat, Berisha lexoi disa komunikime mes Ballukut dhe ish-drejtorit të Autoritetit Rrugor Shqiptar (ARRSH), Evis Berberi, ku sipas opozitës evidentohet përfshirja direkte e ministres në vendimmarrjen për hapjen, mbylljen dhe strukturimin e procedurave të prokurimit.
Akuza për koordinim politik dhe ndërhyrje direkte
Sipas Berishës, nga komunikimet e publikuara rezulton se Balluku i referohet një dakordësimi të mëparshëm me kryeministrin Edi Rama, si dhe shpreh pakënaqësi për veprime të ndërmarra nga vartësi i saj pa dijeninë e saj.
Në një nga mesazhet e lexuara nga Berisha, Balluku shprehet se nuk duhet të hapen procedura të reja për shkak të mungesës së fondeve, ndërsa kritikon ashpër mënyrën se si janë strukturuar disa tendera dhe afatet e tyre.
Po ashtu, sipas komunikimeve të publikuara, Balluku ngre shqetësime për hapjen e disa procedurave supervizimi dhe kërkon shpjegime për faktin që vendime të tilla janë marrë pa miratimin e saj.
“Nuk më pëlqen që nuk e di çfarë bën ti”
Në një tjetër pjesë të bisedës, Balluku shprehet e pakënaqur që nuk është informuar për veprimet e ndërmarra nga drejtuesi i ARRSH-së, duke theksuar se kjo mënyrë funksionimi nuk është e pranueshme.
Sipas Berishës, këto komunikime provojnë se ministrja ka pasur rol aktiv dhe kontroll të drejtpërdrejtë mbi procedurat e prokurimit, duke tejkaluar kompetencat formale dhe duke ndikuar në proceset administrative.
Berisha: Provat tregojnë përgjegjësi më të gjerë
Kreu i PD-së deklaroi se përgjimet e publikuara janë pjesë e një dosjeje më të gjerë hetimore dhe sipas tij, tregojnë se vendimmarrja për tenderat nuk ka qenë individuale.
“Këto komunikime tregojnë se kemi të bëjmë me një sistem të koordinuar vendimmarrjeje, ku përgjegjësia nuk është vetëm individuale, por shtrihet më lart”, u shpreh Berisha.
Ai shtoi se këto prova, sipas tij, mbështesin kërkesën e SPAK për heqjen e imunitetit dhe arrestimin e Ballukut, si dhe hedhin dritë mbi mënyrën se si janë menaxhuar fondet publike në projektet e mëdha infrastrukturore.
Hetimet në vijim
Prokuroria e Posaçme ka kërkuar zyrtarisht autorizimin e Kuvendit për heqjen e imunitetit të Belinda Ballukut, e cila akuzohet për shkelje të barazisë në tendera, ndërsa hetimet për procedurat e Unazës së Madhe dhe projekte të tjera infrastrukturore vijojnë.
