Bisedimet mes përfaqësuesve të Ukrainës dhe Shteteve të Bashkuara, që po zhvillohen në Berlin, po hasin në vështirësi serioze, pasi pala amerikane nuk po shfaq gatishmëri për të bërë kompromis mbi draftmarrëveshjen e saj për paqen.
Kështu raporton Wall Street Journal, pas raundit të parë të negociatave të zhvilluara të dielën, të cilat pritet të vijojnë edhe sot. Sipas burimeve të cituara nga media amerikane, “negociatat mes Ukrainës dhe partnerëve të saj perëndimorë janë shndërruar në një tërheqje litari, edhe pa praninë e Rusisë në tryezë”.
Uashingtoni po shtyn për një zgjidhje të shpejtë të konfliktit, ndërsa presidenti ukrainas Volodymyr Zelensky dhe aleatët evropianë theksojnë se mbeten dallime thelbësore, veçanërisht sa i përket çështjes së tërheqjes nga rajoni i Donbasit dhe mungesës së garancive të qarta të sigurisë për Ukrainën.
Raporti vëren se administrata amerikane po kërkon fleksibilitet nga Kievi, ndërkohë që vetë SHBA-të nuk janë të gatshme të rishikojnë pikat kyçe të planit të tyre të paqes. Kjo qasje ka shtuar tensionet edhe me vendet evropiane, të cilat kërkojnë që çdo marrëveshje të përfshijë garanci të forta dhe afatgjata sigurie për Ukrainën.
Më herët, Zelensky ka sinjalizuar gatishmërinë për të hequr dorë nga aspirata për anëtarësim në NATO, një ndryshim i madh që shënon një kthesë strategjike për Kievin dhe përmbush një nga kërkesat kryesore të Rusisë. Megjithatë, Ukraina mbetet e vendosur kundër çdo lëshimi territorial ndaj Moskës.
Sipas Wall Street Journal, pikërisht këto dallime po e bëjnë të vështirë arritjen e një konsensusi, duke rrezikuar që bisedimet në Berlin të përfundojnë pa një marrëveshje konkrete dhe duke e lënë procesin e paqes në një fazë të pasigurt.
