Gjykata e Posaçme kundër Korrupsionit dhe Krimit të Organizuar (GJKKO) ka vendosur dërgimin për gjykim të dosjes penale ndaj grupit të strukturuar kriminal të drejtuar nga Laert Haxhiu, pas përfundimit të seancës paraprake të mbajtur më 12 dhjetor 2025.
Në këtë procedim penal janë të pandehur Laert Haxhiu, Kristi Bixheku dhe Artan (Marjus) Tafani, të cilët akuzohen për një sërë veprash të rënda penale të kryera në kuadër të një grupi të strukturuar kriminal.
Sipas vendimit të gjykatës, Laert Haxhiu akuzohet për disa episode të “shkatërrimit të pronës me eksploziv”, “mbajtjes pa leje të armëve dhe lëndëve plasëse”, “vrasjes me paramendim”, “vrasjes për interes”, “vrasjes për gjakmarrje”, si dhe “vjedhjes me armë”, të gjitha të kryera në formën e veçantë të bashkëpunimit dhe në funksion të një organizate kriminale. Akuzat lidhen me ngjarje të ndodhura në disa qytete të vendit, përfshirë Lushnjën, Tepelenën, Peqinin, Durrësin dhe Shijakun, gjatë periudhës 2021–2024.
Kristi Bixheku akuzohet për përfshirje në disa raste të shkatërrimit të pronës me eksploziv, mbajtje pa leje të armëve dhe sigurim të kushteve dhe mjeteve materiale për kryerjen e vrasjeve, gjithashtu në kuadër të grupit të strukturuar kriminal. Ndërkohë, Artan (Marjus) Tafani akuzohet për sigurim të kushteve dhe mjeteve materiale për kryerjen e vrasjes, në bashkëpunim dhe në funksion të organizatës kriminale.
Gjatë seancës paraprake, gjykata pranoi kërkesën për dërgimin e çështjes në gjykim, duke vlerësuar se ekzistojnë prova të mjaftueshme për mbështetjen e akuzave të ngritura nga Prokuroria e Posaçme. Po ashtu, u vendos që kërkesa për gjykim të shkurtuar e paraqitur nga Kristi Bixheku dhe Artan Tafani të shqyrtohet nga një trup gjykues i përbërë nga tre gjyqtarë, i ndryshëm nga trupi monokratik që zhvilloi seancën paraprake.
Dosja hetimore përbëhet nga dhjetëra volume me mijëra faqe materiale, ku përfshihen procesverbale, deklarime dëshmitarësh dhe prova të administruara gjatë fazës së hetimit paraprak.
Me këtë vendim, çështja hyn zyrtarisht në fazën e gjykimit, ndërsa pritet që në vijim të përcaktohet trupi gjykues dhe kalendari i seancave për shqyrtimin në themel të akuzave ndaj të pandehurve.
