Prokuroria e Tiranës ka depozituar në gjykatë kërkesën për konfiskimin e disa pasurive të paluajtshme të shtetasit Elton Arkaxhiu, i dënuar më parë në Francë për trafikim narkotikësh, si dhe të personave të lidhur me të. Hetimet e kryera gjatë vitit 2024 kanë zbuluar se një pjesë e konsiderueshme e pasurive të familjes Arkaxhiu nuk justifikohen me të ardhura të ligjshme.
Sipas Prokurorisë, analiza financiare ka treguar se gjatë periudhës 2005–2010, kur janë blerë disa prona me vlerë të lartë, Arkaxhiu dhe vëllai i tij B. Arkaxhiu nuk kanë pasur mundësi ekonomike për t’i përballuar këto investime. Totali i të ardhurave të deklaruara – nga rroga, pensione, aktivitete tregtare, kredi apo hua – është shumë më i ulët se shpenzimet dhe investimet e kryera.
Blerje pasurish pa burim të justifikuar
Hetimi ka identifikuar tre pasuri problematike:
- Një truall me sipërfaqe 71.52 m² dhe ndërtesë 37.52 m², blerë në vitin 2010 për 9,3 milionë lekë, tashmë në pronësi të Elton Arkaxhiut.
- Njësi shërbimi 108 m², me vlerë 210.000 euro, e blerë nga vëllai i tij B.A., por e dyshuar se është financuar nga vetë Eltoni.
- Njësi shërbimi 63 m², me vlerë 126.000 euro, e pretenduar si pronë e shtetasit A.M., për të cilën analiza financiare tregon se ai nuk ka pasur asnjë mundësi ekonomike për ta blerë në vitet 2005–2006.
Deklarimet e administratorit të shoqërisë “INA” sh.p.k. shtojnë dyshimet, pasi sipas tij në kryerjen e pagesave ka qenë gjithmonë i pranishëm vëllai i Eltonit, ndërsa A.M. nuk ka rezultuar të ketë pasur rol të qartë financiar. Kjo ka çuar në dyshimin se në realitet pasuria kontrollohet nga Arkaxhiu.
Dyshime për burim kriminal të pasurive
Prokuroria thekson se diferencat e mëdha negative mes të ardhurave të ligjshme dhe investimeve të kryera, si dhe lidhja e Arkaxhiut me aktivitet kriminal – për të cilin ai është dënuar në Francë – përbëjnë bazë të fortë ligjore për konfiskimin e pasurive sipas ligjit “antimafia”.
Pasuritë që kërkohet të kalojnë në pronësi të shtetit
Prokuroria pranë Gjykatës së Shkallës së Parë në Tiranë kërkon që në pronësi të shtetit të kalojnë:
- Trualli + ndërtesa (nr. 5/255) – vlera e blerjes 9.332.800 lekë
- Njësia e shërbimit 108 m² – vlerë 210.000 euro
- Njësia e shërbimit 63 m² – vlerë 126.000 euro
Sipas Prokurorisë, këto prona dyshohet se janë krijuar nga burime kriminale të përfituara nga trafiku i drogës.
Kërkesa për konfiskim është paraqitur në bazë të ligjit nr. 10192 “Për parandalimin dhe goditjen e krimit të organizuar, trafikimit dhe korrupsionit përmes masave ndaj pasurisë”, dhe pritet të shqyrtohet nga gjykata në ditët në vijim.
