Në një klimë tensioni të paprecedentë mes Shteteve të Bashkuara dhe Venezuelës, presidenti turk Rexhep Tajip Erdogan ka ndërmarrë një hap diplomatik, duke zhvilluar një bisedë telefonike me presidentin Nicolas Maduro.
Mesazhi i tij ishte i qartë: kanalet e komunikimit duhet të mbeten të hapura dhe tensionet të ulen sa më shpejt.
Sipas presidencës turke, të dy liderët diskutuan si për marrëdhëniet dypalëshe, ashtu edhe për zhvillimet rajonale, me fokus situatën e brishtë në Karaibe. Erdogan theksoi se Turqia po i ndjek me vëmendje të gjitha zhvillimet dhe se problemi mund të zgjidhet vetëm përmes dialogut – një qasje që ai e mbron prej kohësh në arenën ndërkombëtare.
“Shqetësim i madh për paqen në Karaibe”
Ministria e Jashtme e Venezuelës njoftoi se Erdogan ka shprehur “shqetësim të thellë” për kërcënimet që, sipas Caracas-it, cenojnë paqen dhe sigurinë në rajon.
Maduro i ka përshkruar presidentit turk veprimet amerikane si “të paligjshme, të tepruara dhe të panevojshme”, duke nënvizuar rrezikun e një përshkallëzimi ushtarak.
Lidhje të forta Ankara–Caracas
Marrëdhëniet mes Turqisë dhe Venezuelës janë forcuar ndjeshëm gjatë viteve të fundit. Erdogan vizitoi Karakas-in në vitin 2018, duke ofruar mbështetje për rizgjedhjen e Maduros, pavarësisht kritikave ndërkombëtare për parregullsi zgjedhore.
Dy liderët kanë kultivuar një raport personal të ngushtë që nga viti 2016.
Maduro ka marrë pjesë në ceremoninë e betimit të Erdogan-it dhe e ka quajtur atë publikisht “vëlla”, ndërsa qytetarët venezuelianë gëzojnë mundësinë të udhëtojnë pa viza drejt Turqisë – një tjetër tregues i afërsisë diplomatike.
Spekulime për strehim politik?
Në media ndërkombëtare janë shfaqur zëra se, në rast përkeqësimi të mëtejshëm të krizës me SHBA-të, Maduro mund të kërkojë strehim politik në Turqi – një skenar që deri tani nuk është konfirmuar nga asnjëra palë.
Ndërhyrja e Erdogan vjen në një moment kritik, duke ngritur shpresën se diplomacia mund të ndalë një përshkallëzim të ri në hemisferën perëndimore. Atmosfera mbetet e tensionuar, por sinjalet e fundit tregojnë se dialogu po rikthehet në tryezë.
