Vllaznia është përballur me një goditje të rëndë në fund të vitit, pasi dy prej afrimeve më të rëndësishme të merkatos, Sherif Kallaku dhe Çarls Bismark, do të mungojnë deri në janar për shkak të dëmtimeve serioze.
Të dy futbollistët u lënduan gjatë ndeshjes së fundit dhe u detyruan të largohen nga fusha, ndërsa kontrollet mjekësore kanë konfirmuar se gjendja e tyre është më e rëndë nga sa pritej fillimisht. Kallaku dhe Bismark vuajnë nga probleme në rrëzët e kofshëve, duke mos i lejuar të rikuperohen para përfundimit të këtij viti.
Për trajnerin Martini, mungesa e tyre përbën një sfidë të madhe, pasi të dy lojtarët përfaqësonin shtylla të rëndësishme në skemën e tij: Kallaku për organizimin e lojës dhe Bismarku si mbështetje e sulmit në krah të Balajt. Alternativat e pakta që ka në dispozicion e bëjnë edhe më të vështirë menaxhimin e ndeshjeve të ardhshme.
Nga ana tjetër, futbollisti Mala ka rezultuar të ketë vetëm një shqetësim të lehtë dhe pritet të rikthehet shumë shpejt në stërvitje me grupin, duke sjellë të paktën një lajm pozitiv në kampin shkodran.
Mungesa e dy yjeve deri në janar pritet të ndikojë dukshëm në lojën dhe rezultatet e Vllaznisë, sidomos në një periudhë ku ekipi ka nevojë për stabilitet dhe vazhdimësi.
